كلمتين في نفسي ولازم أقولهم .. عشان ميجراليش حاجة !

مجلس عسكري عايز الحرق .. حكومة لا بتهش ولا بتنش .. مجلس شعب ولا أجدعها عركة في قهوة على دور طاولة .. ومحدش راضي يجلس .. وتلت اربع المجلس أصلاً مبيعملش حاجة غير إنه يجلس .. وكلام متكرر ومتعاد واتسمع مليون مرة لحد مافاضلي شوية وهجيبلهم إعلانات ميلودي أفلام تعرفهم إزاي تتحدى الملل .. وبجد المجلس لازم يعمل دايت عشان حركته بطيئة ولازم يخف شوية ويتحرك بسرعة .. عشان في أكتر من 10 ماتوا التلات اربع ايام اللي فاتوا دول .. وفي اكتر من 70 اتقتلوا من أسبوع فات .. وفي كتيييييير ماتوا من السنة اللي فاتت ولسة حقهم مجاش .. وكدة فعلاً هنحتاج كتير علام نجيب حق الناس دي ..

وبجد يعني حسني لازم يتصرف وميغيبش علينا كتير بطلته البهية .. وميتحججش بالحالة الجوية عشان سعادته كان يقدر يقول للحالة الجوية تقف تديله تعظيم سلام قبل كدة وهو ماشي .. جته نيلة مطرح مهو مرزي ..

وبجد يا داخلية سو سوري إني هضطر أهزقك شوية عشان انتي شور كدة بتستهبلي .. وعشان أبقى فييييييير أوي يعني الثوار مش بلطجية .. والبلطجية موجودين ومندسين .. ده غير الصوابع المندسة الكتير اللي موجودة في كل حتة .. ولو عاوزين نتكلم جد فآه في ناس هدفها تخرب البلد .. وفي ناس عاوزانا نرجع بدل الخطوة اللي طلعناها لقدام مية خطوة ورا .. بس الناس دول مش هما اللي بيضربوا المتظاهرين .. ولا هما اللي الأمن بيضربهم .. في بلطجية وبيعملوا شغب .. والشرطة بتدافع عن نفسها بس بتطيح ف كله وفي ناس ملهاش ذنب بتضيع في الرجلين ..

وبجد مش هنقف عن نقطة خرطوش ومش خرطوش يا جدعان في غلط بيحصل ولازم يقف .. مش هنسيب الكبيرة والناس اللي بتموت ونمسك في الخرطوش .. لو جت عليه وربنا عندي استعداد أعترف إن أنا اللي بضربه بس شوفوا شغلكوا واحموا الناس وبطلوا نزيف الدم اللي مش راضي يقف وبقى عادي عندكوا إن الناس تموت وأكتر عندنا .. 

بطلوا تقولوا معملناش ومسويناش ومضربناش .. وبعدين عادي يعني المجلس الموقر إيزي مش هيعلقلكوا حبل المشنقة لو قولتوا آه غلطنا .. لو كنا فالحين أوي كنا علقناه لحسحس بس مش قضيتنا دلوقتي .. المهم إننا نبطل العجن اللي بيحصل ده .. 

عشان بجد .. 

الموضوع أكبر من إن مين غلطان ومين صح

ومين بلطجي ومين ثائر بجد

ومين بيدافع ومين بيهاجم

ومين بيخرب ومين مسالم

ومين أغلبية ولا مين أقلية 

ومين له صوت ومين تاني اتخرس

ومين بيعمل ومين مبيعملش

الموضوع أكبر من إهانة للداخلية ولا احترام للمجلس العسكري ولا برلمان مش عارفة أوصفه بإيه

الموضوع كبير عشان في أحلام رسمناها إحنا .. بإيدينا ..

ودفع تمنها شباب كتير أوي زينا 

منفرقش عنهم كتير 

بس هما أحسن مننا بكتير .. 

والأحلام اللي اتدفع تمنها غاااااالي أوي دي بتضيع بسببكوا 

عشان كان نفسنا في حاجة اسمها كرامة .. حياة 

وعيش .. حرية .. وعدالة إجتماعية ..

الموضوع أكبر من ماتش كورة .. وانفلات أمنى 

أكبر من تخوين ومؤامرات 

أكبر من أي حاجة 

 

أكبر من سيادة الوزير ورئيس المجلس ..

يا ناس إفهموا احنا عاوزين هدف

وانتوا كل مرة بتبعدوه عننا

وكل أما نحسنا بنقرب منه ولو خطوة 

نكتشف إن كل اللي بيزقنا لورا هي مصالحكوا واتجاهاتكوا وحفظ كرامة ماء وجهكوا أنتوا

ولسة لحد دلوقتي كل أب بيرفع صورة أبنه اللي مات من غير سبب 

ولسة لحد دلوقتي مفيش أم سامحتكوا على انكوا فرطتوا ف إبنها بسهولة كدة

وإن دمه عندكوا رخيص أوي كدة

إحنا شباب .. صح ممكن ميكونش عندنا نفس فكركوا وخبراتكوا 

بس عندنا عقل وبيفكر أحسن منكوا مليون مرة 

على الأقل لما بنقف جنب بعض بنبقى بجد صف واحد

ولما حد بيتكلم فينا بنسمعه

ومحدش بيقول للتاني اسكت اسمع أخوك

ممكن لو تنزلوا التحرير تتعللموا مننا إزاي تمشوا مجلسكوا الموقر وتسمعوا بعض

يمكن تتعملوا إزاي تقفوا إيد واحدة ضد أياً كان أصابع مندسة أو عناصر تخريبية .. 

يمكن لو نزلتوا التحرير تتعلموا إزاي تتخصلوا من المسميات اللي قارفين نفسكوا وقارفينا بيها .. تتخلصوا من كلمة  حزب وفئة واتجاه

وتتعلموا يعني إيه كلمة إنسان 

حلم 

هدف 

كرامة 

ويمكن كمان تحسوا بعض كدة وانتوا قاعدين

وكل واحد فيكوا يبص في عينين النائب العضو زميله

ويفكر للحظة إنه لو كان إينه اللي مات 

كان هيتمنى من اللي قدامه إنه يقف وبأعلى صوته يدافع ويجيب حقه

وإنه لازم هو كمان يعمل كدة لو كان إين زميله هو اللي مات

انتوا ناس كبيرة وعقول بتفكر بس مفيش روح 

إنتوا أجساد صماء وماكينات بتفكر بطريقة واحدة وبتردد كلام واحد وقالبكوا كلكوا واحد

مبنطلبش منكوا حاجة غير إنكوا متضيعوناش 

بذنب مش ذنبنا 

مبنطلبش منكوا غير إنكوا تتعلموا مننا ولو حاجة واحدة صغيرة 

إني مش لازم اكون أي حاجة .. أي حاجة خاااالص .. عشان أبقى مصري 

بيحب البلد دي بجد

وعاوز يخدمها ويعليها بجد

يا برلمانا الموقر ..

يا وزيرنا المسئول 

يا أي حد ممكن يسمعنا .. 

متخلوناش نندم إننا اعتمدنا عليكوا 

عشان تحققوا حلمنا 

وأرجوكوا .. متضيعوناش !!