أحلام شفافة ..

كان نفسي أحلم حلم بيعرف يطير

بس دايماً مش برسم الجناحين زي بعض ..

وكان نفسي أبقى أحسن من كدة ..

بس مقدرتش .. للأسف ..

وكان نفسي حاجات كتير حلوة تحصل ..

بس لعبكة الدنيا ادخلت وبوظت الدنيا 

كان نفسي أذاكر شوية زيادة .. 

بس اتخنقت من أم دي مادة عايزة الحرق ..

لمؤاخذذة يعني ..

كان نفسي أبقى أنيميشن ..

وأبقى جنية .. بشعر بني قصير ومنكوش ..

وفستان أبيض بحزام برتقاني بيلمع ..

وألبس شرابين واحد أبيض وواحد برتقالي .. وواحد طويل وواحد قصير

عشان دايماً نعكوشة وفوضوية ومستعجلة 

وعصايتي على شكل نجمة ..

وفيها شرايط ألوان كتير ..

وجناحاتي .. بس تعرف تطير 

وهبقى جنية مثالية .. برفكت .. 

مش شرط تكون بالنسبة لأي حد مثالية .. بس بالنسبة لي هتبقى كدة 

عشان هشوف فيها كل حاجة كان نفسي تبقى موجودة .. ومكانتش

وكمان عشان هحقق لكل طفل صغير أحلامه الصغيرة العسولة اللي على قده

وهبعد عن الناس الكبيرة .. المعقدة !

كان نفسي أوي أعمل حاجة لمصر ..

آه والله كان عندي أمل

ومفائلة بزيادة 

بس حالياً .. مش عارفة أعمل حاجة لبابا

هعمل حاجة لمصر إزاي ؟

كان نفسي يبقى عندي عجلة .. 

وفساتين .. زي اللي بابا كان بيجيبهالي وأنا صغيرة 

وكان نفسي مضطرش أخد بالي من كلامي ولا من حركاتي في وسط الناس

بس للأسف .. مجتمع ذو تفكير مضلم .

كان نفسي أفتح محل ورد

ولسة نفسي

بس ساعتها هحطه كله في البيت ومش هبيعه لحد ..

فراشات ..

حبيتها كدهو ..

وهفضل أحبها .. 

هو كدة !

كان نفسي أحلامي متبقاش شفافة كدة

متقعش بسرعة كدة

وكان نفسي ف حد يقدر 

ويحافظ على حلم واحد بس

ويحققه .. 

بقيت بخاف أحلم

 لأن كل حلم سكني في يوم عزيز عليا

وعشان لما حلمي بيتهد .. أنا كمان بتهد

----

رسمته ..

حلم صغير .. شفاف

زي جناحات فراشة انت عارفها 

ومش عاوزة أعترف بالحقيقة 

إني خايفة يبقى زي كل أحلامي

هش 

وعشان كدة لحد دلوقتي

خايفة ألمسه !